An rauba Santo Vitòri

RAUBON LOU PATRIMÒNI DE PROUVÈNÇO

Dins lis Aup de Nauto Prouvènço, raubon lou patrimòni di prouvençau : lou dimenche 28 de janvié de 2018, an rauba lou buste-relicàri de santo Vitòri, patrouno de Simiano la Routoundo, vilajoun touristi couneigu, proche Banoun.

Coume l’a di Louis Laudun, premié conse de Simiano la Routoundo, es l’amo dóu vilage qu’an raubado.

D’efèt, au mes de mai, pèr li voto, li simianen celèbron uno messo en l’ounour de la santo patrouno e, i’a enca quàuquis annado d’acò, fasien lou passo-carriero darrié lou buste-relicàri pèr fin de benesi lis oustau.

An peta lou pourtau, vuja li placard de la sacrestìo. Lou buste-relicàri de santo Vitòri, de bos cubert de placo d’argènt, ex voto baia pèr de vilajan recouneissènt, èro uno obro d’art dóu siècle 15en que dedins i’avié de reliclo de la santo. En mai d’acò, an rauba un bras de sant Marc e un calice d’argènt dóu siècle 18en, classa au patrimòni di Mounumen istouri em’enca un cibòri d’argènt dóu siècle 19en.

À tóuti li prouvençau qu’aurien pouscu vèire lou buste-relicàri de santo Vitòri (foutò çai-jouncho), Me Dison Prouvènço mando un rampèu : à-n’aquéli, ié demandan de souna li gendarmo sènso mai espera.

Brunoun THOMAS

Presidènt de la Federacioun PARLAREN AUP DE PROUVÈNÇO

Souto-presidènt de la COOURDINACIOUN PARLAREN

________________________________________________________________________________________________________________________________________________________________