Fau boulega tout acò !

OdileDespièi lou siècle 19, d’assouciacioun d’aparamen de la lengo prouvençalo eisiston. Dins aquéli d’aqui, de prouvençau de la bono an viscu, embarra entre éli. T’an fa de vers à mouloun, de fèsto à bóudre emai forço peticioun e pamens, uei, la presènci dóu prouvençau dins l’ensignamen coume dins la prèisso escricho o audiou-visualo se vèi quàsi pas.

Adounc, nous fau boulega tout acò ! Nous fau sourti di pichot roudelet d’inicia que se creson impourtant bord que s’atribuïsson de medaio lis un is autre. Aquéli d’aqui soun pas lou pople prouvençau que, cade jour, patis dóu crèis di pres, dóu manco de travai. En ribo de mar, o, dins d’endré requist coume Aupiho e Leberoun, lis estrangié riche croumpon la terro prouvençalo, n’en fan crèisse lou pres e enebisson is enfant dóu païs de se louja. Lou poudé parisen, sis entre-presso t’an empega de centralo atoumico, Marcoule, Tricastin, que, se peton, coume au Japoun, ti mudaran Prouvènço touto en un desert radiouatiéu. Es pas nourmau ! Lou devé di sourdat de la lengo e dóu terraire es de recampa lou pople à l’entour dis interès siéu dins un gros mouvemen poupulàri, demoucrati e prouvençau.

Oudilo Delmas

_________________________________________________________________________