GARDAREN PROUVÈNÇO, 7000 PROUVENÇAU EN ARLE PÈR LA LENGO PROUVENÇALO

GARDAREN PROUVÈNÇO

 

LOU 24 D’ÓUTOBRE DE 2015, EN ARLE,

7 000 PROUVENÇAU :

 

MANDY GRAILLON

E

JAN-PÈIRE RICHARD

 VOUES DE PROUVÈNÇO

 

 

MANDY GRAILLON E JAN-PÈIRE RICHARD, VOUES DE PROUVÈNÇO EMÉ 7000 PROUVENÇAU

 

Lou dissate 24 d’óutobre de 2015, en Arle, la manifestacioun GARDAREN PROUVÈNÇO, baiè i prouvençau uno estrambourdanto journado, versanto d’espèr pèr soun aveni.

 

Prouvènço touto i’èro : prouvençau di campagno, prouvençau di ciéuta… N’i avié 7000 emé si voues, Mandy Graillon, sa rèino d’Arle e Jan-Pèire Richard lou flame presidènt dóu Couleitiéu Prouvènço e baile de la Couourdinacioun GARDAREN PROUVÈNÇO.

 

E, sas ? dins aquelo manifestacioun, cadun d’aquéli prouvençau chifrè à la grosso respounsableta pèr l’aveni de SA lengo, de SI tradicioun, de SOUN ecounoumìo, de SOUN identita. Basto ! de SA Prouvènço. Uno respounsableta que partis emé la Couourdinacioun GARDAREN PROUVÈNÇO.

 

LA LENGO, LI TRADICIOUN, LA BOUVINO E L’ECOUNOUMÌO

 

Aquesto manifestacioun grandarasso recampè tout ço que fai l’identita prouvençalo : la bouvino emé la Counfrarié di Gardian, segur, lou vièsti, osco-seguro, e quant d’àutris assouciacioun… pèr la lengo, i’avié lou Couleitiéu Prouvènço, l’Unioun Prouvençalo, la Couourdinacioun Parlaren, lou Prouvençau à l’Escolo, lis escolo e lis assouciacioun Parlaren.

 

Mancavo pas, nimai, li tenènt de l’ecounoumìo emai de l’ecoulougìo terradourenco, valènt-à-dire li baile de la risiculturo camarguenco amenaçado pèr Paris e lis istitucioun éuroupenco.

 

BOUCO-de-ROSE E VAU-CLUSO : ESCOLO E PARLAREN

 

N’i avié, de mounde, vengu de tóuti li despartamen de la regioun Prouvènço emai de l’en-deforo : Gard, Ardecho, Droumo.

 

Avèn, pièi, de nouta que tóuti lis assouciacioun dóu relarg marsihés èron aqui, autant lis escolo coume li Parlaren.

 

Demié lis escolo : Escolo de la Nerto, Escolo de la Mar, Roudelet de Castèu-Goumbert e sabe pas quant d’autre… demié li Parlaren : Parlaren Gardano, Parlaren St-Savournin, Parlaren Alau, Parlaren Peipin, Parlaren Palais de Justiço, Parlaren Massilia.

 

Vau-Cluso i’èro tambèn, noumbrouso : Vedeno, Perno, Cavaioun, Parlaren Bedarrido (emé Ano-Marìo Ferreira, sa presidènto), Parlaren Lou Pountet (emé Martino Salvagno), Parlaren Intra-Muros d’Avignoun emé Sèrgi Goudard…

 

LI FEDERACIOUN D’ASSOUCIACIOUN

 

Lou presidènt Tabacchi menavo l’Alianço Éuroupenco di Lengo Regiounalo e li baile d’assouciacioun de Valènço en Espagno, de Naple, di Valèio prouvençalo d’Itàli, de Biarn, de Lengadò e di Ceveno.

 

Se vesié enca lou courtege de l’Unioun Prouvençalo e soun presidènt Jan-Pèire Vianés apiela pèr Marcèu Ughetto, Anìo Sauvan, Gibert Tauvat e Marius Deleuil.

 

Bandiero davans, la Couourdinacioun Parlaren menavo lou courtege PARLAREN quouro sa presidènto Oudilo Delmas caminavo en tèsto de manifestacioun emé Jan-Pèire Richard.

 

Li jouvènt i’èron emé l’Assouciacioun di Jouine Lengadò-Prouvènço (23 assouciacioun).

 

Se pòu dire qu’emé si troupo, s’atroubavon li baile de tóuti lis ourganisacioun representativo de PROUVÈNÇO.

 

LIS ELEGI E LA DICHO DE JAN-PÈIRE RICHARD 

 

Lis elegi nous an fa pensa à-n’uno cansoun franceso que si paraulo fan : « Ils sont venus, ils sont tous là. Elle va mourir la Mama ».

 

D’efèt, n’i avié mai de 150 : conse, deputa, counseié regiounau emai despartamentau qu’emé si chierpo semblavon de courpatas ! En troupeto, à despart, dins lou courtege dis elegi, quàsi degun mancavo di tèsto de listo is eleicioun regiounalo venènto : Crestian Estrosi, Cristòu Castaner e Marioun Maréchal-Le Pen.

 

Mai d’aquélis elegi faguèron li canard mut que lis ourganisaire de la manifestacioun i’avien leva la paraulo !

 

Lou bèu moumen de la manifestacioun fuguè la dicho de Jan-Pèire Richard, baile de la Couourdinacioun GARDAREN PROUVÈNÇO.

 

Aquesto dicho debanè tout ço que fai l’identita de Prouvènço : apara e desveloupa l’ecounoumìo de Prouvènço (soun ris amenaça pèr Paris e l’Éuropo), apara e sousteni li tradicioun e, mai que tout, li de la bouvino, desveloupa l’ensignamen de la lengo prouvençalo.

 

Coume lis autre, li prouvençau pagon l’impost.

Adounc, coume lis autre, an lou dre de touca de suvencioun di couleitivera loucalo emai de l’Estat pèr sis assouciacioun. 

 

Mai, mai que tout, lou Gouvèr se dèu d’apoundre lou prouvençau dins la tiero di lengo regiounalo de Franço.

 

Fàci is elegi, Jan-Pèire Richard acabè soun prepaus : ié diguè que se fan pas ço que fau pèr Prouvènço, éli, trouvaran davans éli la Couourdinacioun GARDAREN PROUVÈNÇO.

 

Oudilo Delmas

Presidènto de la Couourdinacioun Generalo Parlaren.

 ______________________________________________________________________________